ສປປ ລາວ ພວມປະເຊີນກັບການລະບາດໂຄວິດ-19 ຮອບທີ 3

ສປປ ລາວ ພວມປະເຊີນກັບການລະບາດໂຄວິດ-19 ຮອບທີ 3

ຂປລ. ທ່ານ ດຣ ລັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ໄດ້ລາຍງານໃຫ້ຮູ້ ໃນວັນທີ 11 ມີນາ 2022 ນີ້ວ່າ: ສປປ ລາວ ມາຮອດມື້ນີ້ ໄດ້ປະເຊີນໜ້າກັບການລະບາດເປັນຮອບທີ 3 ແລ້ວ,

ຕົວເລກຜູ້ຕິດເຊື້ອມີທ່າອ່ຽງຂຶ້ນ, ຕົວເລກຕິດເຊື້ອບາງແຂວງ ໂດຍສະເພາະນະຄອນຫລວງວຽງຈັນ ເຫັນວ່າກັບຄືນມາເພີ່ມສູງຂຶ້ນໃນແຕ່ລະວັນ ພາຍຫລັງທີ່ພວກເຮົາເຫັນຕົວເລກຜູ້ຕິດເຊື້ອປະຈຳວັນຕ່ຳກ່ວາ 200 ຄົນ ເປັນເວລາເກືອບ 1 ເດືອນ.

ຕໍ່ສະພາບດັ່ງກ່າວ, ທ່ານ ດຣ ລັດຕະນະໄຊ ເພັດສຸວັນ ໄດ້ຮຽກຮ້ອງໃຫ້ໝົດທຸກພາກສ່ວນ ໃນສັງຄົມຈົ່ງມີສະຕິລະວັງຕົວ, ບໍ່ໃຫ້ລະເຫລີງ, ເມີນເສີຍ ຫລື ຖືເບົາຕໍ່ການລະບາດໃນຄັ້ງນີ້, ຂໍໃຫ້ເອົາໃຈໃສ່ສຸມທຸກກຳລັງ ສຸມໃສ່ຂະບວນວັກສັກວັກຊິນທີ່ກຳລັງຈັດຕັ້ງປະຕິບັດ

ເພື່ອເຮັດແນວໃດໃຫ້ອັດຕາການສັກວັກຊິນປ້ອງກັນໂຄວິດ-19 ໃຫ້ບັນລຸສູງກວ່າ 80% ໂດຍໄວ ເຊິ່ງການປະຕິບັດທັງໝົດນີ້ ກໍເພື່ອສ້າງພູມຄຸ້ມກັນໝູ່ໃນຊຸມຊົນ ແລະ ເລັ່ງໃສ່ການຫລຸດຜ່ອນອັດຕາການຕິດເຊື້ອ ແລະ ສູນເສຍຊີວິດໃຫ້ໜ້ອຍລົງທີ່ສຸດ.

ສະເພາະໃນວັນທີ 10 ມີນາ 2022 ໄດ້ກວດວິເຄາະທັງໝົດ 2.437 ຕົວຢ່າງ ໃນຂອບເຂດທົ່ວປະເທດ ແລະ ພົບເຊື້ອ ທັງໝົດ 413 ຄົນ (ຕິດເຊື້ອພາຍໃນ 384 ຄົນ ແລະ ນໍາເຂົ້າ 29 ຄົນ). ປັດຈຸບັນ ຢູ່ ສປປ ລາວ ມີຜູ້ຕິດເຊື້ອສະສົມທັງໝົດ 145.507 ຄົນ, ອອກໂຮງໝໍວານນີ້ 33 ຄົນ, ກຳລັງປິ່ນປົວ 1.680 ຄົນ ແລະ ເສຍຊີວິດທັງໝົດ 640 ຄົນ (ເສຍຊິວິດໃໝ່ 3 ຄົນ ຈາກບໍລິຄໍາໄຊ 1 ຄົນ, ຫລວງພະບາງ 1 ຄົນ ແລະ ຊຽງຂວາງ 1 ຄົນ).

ທ່ານ ດຣ ລັດຕະນະໄຊ ເພັດສຸວັນ ຍັງໃຫ້ຮູ້ອີກວ່າ: ຈາກການສຸ່ມເກັບ 10 ຕົວ ຢ່າງ ໃນນະຄອນຫລວງວຽງຈັນ ພົບວ່າ 90% ແມ່ນກວດພົບເຫັນສາຍພັນ ໂອໄມຄຣອນ ແລະ ບົດຮຽນຈາກຫລາຍໆປະເທດ ໂດຍສະເພາະປະເທດໃກ້ຄຽງ ການລະບາດຮອບໃໝ່ນີ້ຈະເຖິງຈຸດສູງສຸດໃນ 1 ຫາ 2 ເດືອນນີ້.

ສະນັ້ນ, ຖ້າຫາກພວກເຮົາ ຫາກບໍ່ມີມາດຕະການທີ່ຮັດກຸມອອກມາເພື່ອຕອບໂຕ້ ແລະ ຮອງຮັບການລະບາດໃນຄັ້ງນີ້, ເຖິງວ່າອັດຕາການເສຍຊີວິດ ຈະບໍ່ຮຸນແຮງຄືກັບສາຍພັນເດວຕ້າກໍຕາມ ແຕ່ການເສຍຊີວິດ ແມ່ນຈະກະທົບຢ່າງໜັກໜ່ວງ ຕໍ່ຜູ້ທີ່ມີອາຍຸສູງກວ່າ 60 ປີ, ຜູ້ທີ່ມີພະຍາດປະຈຳໂຕ, ແມ່ຍິງຖືພາ ແລະ ຜູ້ທີ່ບໍ່ທັນໄດ້ສັກວັກຊິນ ຫລື ສັກວັກຊິນບໍ່ຄົບທຸກເຂັມທີ່ແນະນຳ.

ຂ່າວ: ມະນີທອນ

Related Articles

Leave a Reply

Your email address will not be published.

Back to top button