ຈາກເດັກຍິງກຳພ້າ ກາຍເປັນ ຜູ້ປ່ຽນແປງວົງການແຟຊັ່ນໂລກ

ຈາກເດັກຍິງກຳພ້າ ກາຍເປັນ ຜູ້ປ່ຽນແປງວົງການແຟຊັ່ນໂລກ

ຖ້າເວົ້າເຖິງນັກທຸລະກິດຍິງ ທີ່ປະສົບຄວາມສຳເລັດຢ່າງສູງ ໃນສະຕະທີ່ 20 ຊື່ຂອງ Coco Chanel ຈະຕ້ອງຕິດຢູ່ໜຶ່ງໃນນັ້ນຢ່າງແນ່ນອນ.

ກວ່ານາງຈະມີມື້ນີ້ໄດ້ນັ້ນ ເສັ້ນທາງຊີວິດຂອງນາງບໍ່ໄດ້ສວຍຫຼູຢ່າງທີ່ທຸກຄົນເຫັນ ເພາະນາງເຕີບໂຕມາໃນຄອບຄົວທີ່ຍາກຈົນ ແລະກຳພ້າແມ່ຕັ້ງແຕ່ນາງຍັງເດັກນ້ອຍ ແຕ່ສຸດທ້າຍນາງກໍບໍ່ຍອມຈຳນົນຕໍ່ຄວາມຈົນ ແລະນຳພາຕົວເອງມາສູ່ເສັ້ນທາງຄວາມສຳເລັດ ຈົນກາຍເປັນເສດຖີພັນລ້ານໄດ້ໃນທີ່ສຸດ.

Coco Chanel ກ່ອນນັ້ນມີຊື່ວ່າ Gabrielle Bonheur Chanel ເກີດເມື່ອວັນທີ 19 ສິງຫາ ປີ 1883 ທີ່ເມືອງ Saumur (ຊູເມີຣ) ປະເທດຝຣັ່ງ ເປັນລູກສາວຄົົນທີ່ 2 ຈາກພີ່ນ້ອງທັງໝົດສີ່ຄົນ ຂອງ ອັນເບີນຕ ຊາແນນ ກັບ ຢູເຊນີ ຊານ ເດີໂວນ ໂດຍແມ່ຂອງນາງເຮັດວຽກເປັນຄົນຊັກຜ້າໃນໂຮງໝໍການກຸສົນ ສ່ວນພໍ່ຂອງນາງເປັນພໍ່ຄ້າຂາຍເສື້ອຜ້າ ທີ່ຕ້ອງພະເນຈອນໄປທົ່ວເມືອງ ເຊິ່ງຄອບຄົວຂອງນາງມີຖານະທີ່ຍາກຈົນຫລາຍ.

ມື່ອ Chanel ອາຍຸໄດ້ 12 ປີ ແມ່ຂອງນາງກໍໄດ້ເສຍຊີວິດດ້ວຍພະຍາດຫລອດລົມອັກເສບ ສ່ວນພໍ່ຂອງນາງກໍຫາຍຕົວໄປ ນາງແລະເອື້ອຍໆນ້ອງ ໆ ຈຶ່ງຖືກສົ່ງໄປຢູ່ທີ່ ສະຖານຮັບລ້ຽງເດັກກຳພ້າຄອນແວລຕ໌ໂອບາຊີ

ຕໍ່ມາເມື່ອ Chenel ອາຍຸໄດ້ 18 ປີ ນາງໄດ້ຍ້າຍໄປອາໄສຢູ່ທີ່ຫໍພັກສຳລັບເດັກສາວທີ່ນັບຖືສາສະຫນາຄຣິສຕ໌ນິກາຍຄາທໍລິກໃນເມືອງ ມູແລງສ໌ ເຊິ່ງຕະຫລອດໄລຍະເວລາ 6 ປີ ທີ່ນາງໄດ້ໃຊ້ຊີວິດຢູ່ໃນຄອນແວນຕ໌ ນາງໄດ້ມີໂອກາດຮຽນຮູ້ການຕັດຫຍິບເສື້ອຜ້າ ປະກອບກັບນາງມີຄວາມສົນໃຈ ມີຄວາມພຽນພະຍາຍາມ ຂະຫຍັນອົດທົນ ແລະມີຄວາມກະຕືລືລົ້ນທີ່ຈະຮຽນຮູ້

ຈົນນາງສາມາດປະກອບອາຊີບເປັນຊ່າງຕັດຫຍິບເສື້ອຜ້າ ເພື່ອຫາລາຍໄດ້ລ້ຽງຊີບໄດ້ ນອກຈາກນີ້ ນາງຍັງໃຊ້ເວລາຫວ່າງ ຫຼັງຈາກຫຍິບຜ້າເພື່ອໄປຮ້ອງເພງກັບໝູ່ເພື່ອນ ທີ່ຄາບາເຣ່ ເພື່ອຫາລາຍໄດ້ພິເສດເສີມນຳພ້ອມ ແລະຊື່ Coco ນັ້ນ ກໍໄດ້ມາຈາກທ່ອນທຳນອງເພງທີ່ນາງມັກຮ້ອງທີ່ມີຊື່ວ່າ Qui qu’a vu Coco ແຕ່ພໍເຮັດໄປໄດ້ບໍ່ດົນ ນາງກໍຮູ້ສຶກວ່າອາຊີບນັກຮ້ອງນັ້ນ ບໍ່ຄ່ອຍເໝາະກັບນາງພໍປານໃດ?

ຈົນເມື່ອ Chanel ອາຍຸໄດ້ 23 ໃນປີ ຄ.ສ 1905 ນາງກໍໄດ້ພົບຮັກແບບລັບໆ ກັບ Etienne Balsan (ເອຕຽນ ບັນຊອງ) ອະດີດທະຫານມ້າແລະເປັນທາຍາດມະຫາເສດຖີໃນອຸດສາຫະກຳສິ່ງທໍ ດ້ວຍຄວາມທີ່ບັນຊອງນັ້ນລ້ຳລວຍຢ່າງມະຫາສານ ນາງຈຶ່ງໃຊ້ຊີວິດຢ່າງຫຼູຫຼາອະລັງການ ຊຶ່ງນາງມີທັງເຄື່ອງເພັດ ເສື້ອຜ້າ ແລະໄຂ່ມຸກອີກຫລວງຫລາຍ

ແລະໃນປີນີ້ນີ້ເອງ ທີ່ນາງໄດ້ມີໂອກາດພົບກັບ Arthur Edward Capel ທີ່ແນະນຳໃຫ້ Coco ເປີດຮ້ານຂາຍໝວກ ແລະໃນປີ 1909 Chanel ກໍໄດ້ຮັບການສະໜັບສະໜູນທາງດ້ານເງິນທຶນຈາກຄາເປລ ເພື່ອເປີດຮ້ານຂາຍໝວກທີ່ນາງອອກແບບດ້ວຍຕົນເອງ ເທິງຖະໜົນ Cambon

ໃນກຣຸງປາຣີສ ໂດຍໃຊ້ຊື່ຮ້ານວ່າ Chanel Modes ໂດຍໝວກຂອງ Channel ນັ້ນໂດ່ງດັງມາຈາກການທີ່ນັກສະແດງຊາວທີ່ຊື່ Gabrielle Dorziat ໃສ່ໝວກຂອງ Chanel ເຂົ້າສາກໃນຮູບເງົານຳກັນສອງເລື່ອງກໍຄື Bel Ami ແລະ Les Modes ຕໍ່ມາບໍ່ດົນຮ້ານຂອງນາງກໍເລີ່ມເປັນທີ່ຮູ້ຈັກຫລາຍຍິ່ງຂຶ້ນ ເພາະເນື່ອງຈາກເສື້ອຜ້າທີ່ມີການດີໄຊນ໌ທີ່ມີເອກລັກໂດດເດັ່ນ ສະແດງເຖິງຄວາມເປັນຕົນຕົນຂອງນາງອອກມາຢ່າງຊັດເຈນ.

ແຕ່ນາງກັບບັນຊອງ ກໍໄດ້ຢູ່ກິນກັນພຽງ 5 ປີ ຈົນໃນປີ 1910 ນາງກໍໄດ້ເລີກກັບບັນຊອງໄປແລະໄດ້ໄປຢູ່ກິນກັບນາຍທຶນຂອງນາງນັ້ນກໍຄືຄາເປລນັ້ນເອງ.

ຕໍ່ມາໃນປີ 1913 Chanel ໄດ້ຂະຫຍາຍກິດຈະການດ້ວຍໂດຍການໄປເປີດຮ້ານ Boutique ຫລືຮ້ານຂາຍເສື້ອຜ້າສຳລັບຜູ້ຍິງໂດຍສະເພາະ ໃນເມືອງ Deauville (ໂດວິລລ໌) ໂດຍໃຊ້ຊື່ຮ້ານວ່າ Chanel ເຊິ່ງສາມາດດຶງດູດລູກຄ້າຂາປະຈຳໄດ້ເປັນຈຳນວນຫລາຍແລະໄດ້ຢ່າງສະຫມ່ຳສະເໝີ ເນື່ອງຈາກການດີໄຊນ໌ທີ່ບໍ່ຊ້ຳໃຜ ໃສ່ງ່າຍແລະເບິ່ງດີ ຈົນຄົນໃນວົງການແຟຊັ່ນ ຕ່າງກໍຍອມຮັບໃນຄວາມຄິດສ້າງສັນແລະຝີມືໃນການອອກແບບດີໄຊນ໌ເສື້ອຜ້າຂອງນາງ.

ຕົວຢ່າງຊຸດສູດຂອງ Chanel ນັ້ນ ເປັນໜຶ່ງໃນຄໍເລກຊັ່ນທີ່ໂດ່ງດັງໄປທົ່ວໂລກ ຊຶ່ງເບິ່ງທຳອິດ ກໍຈະຮູ້ທັນທີເລີຍວ່າເປັນຊຸດທີ່ມາຈາກ Chanel

ແລະຈາກການທີ່ນາງກ້າຄິດນອກກອບ ນາງຍັງເປັນຄົນທຳອິດໆ ທີ່ຊຸກດັນໃຫ້ຜູ້ຍິງຫັນມາໃສ່ໂສ້ງນຳອີກ ເນື່ອງຈາກຮູບຮ່າງຂອງນາງນັ້ນມີຮູບຮ່າງທີ່ນ້ອຍ ແລະບໍ່ຄ່ອຍມີສ່ວນໂຄ້ງສ່ວນກົມ ຄືກັບຄົນອື່ນປານໃດ? ແຖມສະໄໝນັ້ນຜູ້ຍິງເກືອບທັງໝົດມັກນິຍົມໃສ່ກັນ ສະເພາະກະໂປງສຸ່ມ ແຖມຊຸດກໍມີລັກສະນະຮັດແອວແໜ້ນໆ ເຊິ່ນາງຄິດວ່າດ້ວຍຄວາມທີ່ຮ່າງກາຍຂອງຜູ້ຍິງແຕ່ລະຄົນນັ້ນແຕກຕ່າງກັນ ດັ່ງນັ້ນ, ເສື້ອຜ້າກໍບໍ່ຄວນມີແບບດຽວ ຄວນອອກແບບເພື່ອໃຫ້ເໝາະກັບແຕ່ລະຄົນ

ຈົນໃນປີ 1914 ຮ້ານຂອງນາງກໍຕ້ອງພົບກັບວິກິດຈາກສົງຄາມໂລກຄັ້ງທີ 1 ເຊິ່ງເຮັດໃຫ້ທຸລະກິດຂອງນາງຕ້ອງຢຸດຊະງັກລົງໄປ ແຕ່ນາງກໍຍັງຄົງສຸ່ມແລະມຸ່ງໝັ້ນທີ່ຈະອອກແບບແລະດີໄຊນ໌ເສື້ອຜ້າຢູ່ຢ່າງຕໍ່ເນື່ອງ

ຫຼັງຈາກນັ້ນປະມານ 5 ປີ ໃນປີ 1918 Coco Chanel ກໍກັບມາເປີດຮ້ານອີກເທື່ອ ຈົນກິດຈະການກັບມາຄຶກຄື້ນອີກເທື່ອໜຶ່ງ

ແຕ່ແລ້ວໃນປີ 1919 ຄາເປລ ຜົວທີ່ເປັນທີ່ຮັກຂອງນາງກໍປະສົບອຸບັດຕິເຫດທາງລົດແລະເສຍຊີວິດ ເຊິ່ງສ້າງຄວາມເສຍໃຈແລະສະເທືອນໃຈໃຫ້ແກ່ນາງເປັນຢ່າງຍິ່ງ ນາງຈຶ່ງໄຫວ້ອາໄລໃຫ້ກັບຄາເປລດ້ວຍການ ນຳຜ້າສີດຳມາເຮັດເປັນຊຸດເພື່ອໃຫ້ຜູ້ຍິງທຸກຄົນໃນກຸງປາຣີສໃສ່ ເພື່ອໄວ້ທຸກໃຫ້ກັບຄາເປລອັນເປັນສຸດທີ່ຮັກຂອງນາງ

ຫຼັງຈາກນັ້ນ 1 ປີ ໃນປີ 1920 Chanel ກໍໄດ້ຂະຫຍາຍໄລນ໌ການຜະລິດສິນຄ້າໃໝ່ໆ ເພີ່ມເຕີມເຂົ້າມາ ບໍ່ວ່າຈະເປັນ ເສື້ອຜ້າຄອນເລກຊັ່ນໃໝ່ໆ ໝວກ ເຄື່ອງປະດັບ ຫລື ນ້ຳຫອມ ໂດຍກົນລະຍຸດໃນການກໍ່ການຕະຫລາດໜຶ່ງຂອງນາງກໍຄື ການເຂົ້າສັງຄົມແລະພົບປະຖອ້ລົມກັບເຊເລບິຕີ້ໃນແວດວົງຕ່າງໆ ບໍ່ວ່າຈະເປັນ ສິນລະປິນນັກເປຍໂນ, ນັກບັນເລ່ຊື່ດັ່ງ, ນັກແຕ່ງເພງຂາຍດີ, ນັກກະວີທີ່ມີຊື່ສຽງ, ນັກຂຽນບົດລະຄົນແລະດາລານັກສະແດງທີ່ໂດ່ງດັງ

ເພື່ອຊັກຊວນໃຫ້ມາລອງໃຊ້ຜະລິດຕະພັນຂອງນາງ ເຊິ່ງຫຼາຍໆຄົນ, ເມື່ອໄດ້ມີໂອກາດພົບພໍ້ກັບນາງນັ້ນ ຕ່າງກໍຊື່ນຊົມລາວວ່າ ນາງເປັນຄົົນທີ່ສະຫລຽວສະຫລາດ ເປັນຜູ້ຍິງທີ່ມີສະຕິບັນຍາທີ່ດີ ມີເຫດມີຜົນ ແລະເປັນຜູ້ຍິງທີ່ໄຕ່ຕອງຫລາຍທີ່ສຸດຄົນໜຶ່ງໃນວົງການທຸລະກິດເລີຍກໍວ່າໄດ້.

ຈົນໃນປີ 1921 Chanel ກໍໄດ້ເປີດຕົວນ້ຳຫອມທີ່ຊື່ Chanel No.5 ເຊິ່ງຖືໄດ້ວ່າເປັນນ້ຳຫອມຍີ່ຫໍ້ທຳອິດຂອງໂລກທີ່ຕັ້ງຊື່ນ້ຳຫອມຕາມເຈົ້າຂອງແບຣນດ໌ ແລະນ້ຳຫອມລຸ້ນນີ້ນີ້ເອງ ທີ່ໄດ້ຮັບຄວາມນິຍົມຢ່າງສູງໃນພວກໄຮໂຊແລະຄົນສູງສັກ ແລະກາຍເປັນທີ່ຮູ້ຈັກເປັນວົງກວ້າງທັງໃນເອີຣົບ ແລະອາເມຣິກາ ມາຈົນເຖິງປະຈຸບັນ.

ຕໍ່ມາໃນປີ 1926 ນາງກໍໄດ້ອອກແບບເສື້ອຜ້າຜູ້ຍິງທີ່ຊື່ວ່າ Little Black Dress ເຊິ່ງເປັນຊຸດຍາວປົກຫົວເຂົ່າທີ່ເປີດໃຫ້ເຫັນຂໍ້ຕີນຂອງຜູ້ຍິງເປັນເທື່ອທຳອິດ ເຊິ່ງສະໄໝນັ້ນຍັງນິຍົມໃສ່ກະໂປງທີ່ຄຸມປິດເຖິງຂໍ້ຕີນພຽງຢ່າງດຽວ ໂດຍນິຕະຍະສານຊື່ດັ່ງຢ່າງ Vogue ຍົກຍ້ອງໃຫ້ Little Black Dress ຂອງ Chanel ທຽບກັບລົດຂອງ Ford ທີ່ຢູ່ໃນຊ່ວງປ່ຽນຜ່ານຍຸກຂອງວົງການໃນອຸດສາຫະກຳຂອງຕົນເອງໄປຕະຫລອດການ ວ່າກັນວ່າ ຊຸດຂອງ Chanel ນັ້ນມັກຈະມີດີໄຊນ໌ໃນໂທນຂາວດຳເທົາ ແລະລຽບງ່າຍສະງ່າງາມນັ້ນ ມີແຮງບັນດານໃຈມາຈາກຊຸດຂອງແມ່ຊີທີ່ນາງເຕີບໂຕມານັ້ນເອງ

ໃນປີ 1929 Coco ກໍໄດ້ໃຫ້ກຳເນີດກະເປົ໋າ Chanel ລຸ້ນ 2.55 ເຊິ່ງເປັນກະເປົ໋າຖືທີ່ເຮັດມາຈາກໜັງແລະມີລາຍເຂົ້າຫຼາມຕັດ ໂດຍທີ່ມາຂອງຊື່ກໍຄືມື້ທຳອິດທີ່ວາງຈຳໜ່າຍໃນເດືອນກຸມພາ ປີ 1955 ເຊິ່ງແຕ່ກ່ອນນັ້ນ ເປັນກະເປົ໋າຖືໂດຍບໍ່ໄດ້ມີສາຍສະພາຍ ແຕ່ດ້ວຍຄວາມທີ່ນາງນັ້ນເປັນຄົນສູບຢາ ນາງຈຶ່ງເພີ່ມສາຍສະພາຍເຂົ້າໄປເພື່ອຄວາມສະດວກ ແລະ Chanel 2.55 ກໍເລີ່ມເປັນທີ່ຮູ້ຈັກກັນຫລາຍຂຶ້ນ ເຊິ່ງສົ່ງຜົນຕັ້ງແຕ່ປີ 1955 ຜູ້ຄົນກໍເລີ່ມຫັນມາໃຊ້ກະເປົ໋າແບບມີສາຍສະພາຍກັນແທບທົ່ວເມືອງ ແລະ Chanel 2.55 ນີ້ ກໍໄດ້ກາຍເປັນຊິກເນເຈີອີກອັນໜຶ່ງ ທີ່ບັນດາສາວທົ່ວໂລກຕ່າງກໍຢາກມີໄວ້ກັນໃນຄອບຄອງແທບທັງນັ້ນ.

ຈົນໃນປີ 1935 ນາງຖືກຍົກຍ້ອງໃຫ້ເປັນບຸກຄົນທີ່ປະສົບຄວາມສຳເລັດຢ່າງສູງໃນສາຍອາຊີບຂອງຕົນເອງ ຫລື Peak of fame ເພາະນາງມີຮ້ານຫລາຍເຖິງ 5 ສາຂາ ແລະລູກຈ້າງທີ່ນາງຕ້ອງດູແລເບິ່ງແຍງອີກກວ່າ 4,000 ຊີວິດ

ແຕ່ແລ້ວໃນປີ 1945 ກໍເຂົ້າສູ່ຊ່ວງສົງຄາມໂລກຄັ້ງທີ 2 ເຮັດໃຫ້ທຸລະກິດຂອງນາງຕ້ອງຢຸດຊະງັກ ຮ້ານ Boutique(ຣ້ານເສື້ອຜ້າຜູ້ຍິງ) ຂອງນາງ ຕ້ອງປິດຕົວລົງໄປເຖິງ 4 ແຫ່ງ ເປີດທຳການຢູ່ແຫ່ງດຽວເທິງຖະໜົນ Cambon ຫຼັງຈາກສົງຄາມໂລກຈົບລົງ ນາງກໍກັບມາອີກເທື່ອໜຶ່ງໃນປີ 1954 ໃນອາຍຸ 71 ປີ (ແລະໃນປີ 1955 ກໍໄດ້ຢຸດວາງຂາຍກະເປົ໋າ Chanel 2.55 ນັ້ນເອງ).

ເຊິ່ງຄຳວ່າ Chanel ນັ້ນ ມີຄວາມຫມາຍວ່າ ການເບິ່ງອ່ອນເຍົາ ຄວາມເປັນອິດສະຫລະແລະປາສະຈາກພັນທະນາການໃດໆ

ໂດຍຊີວິດນັກທຸລະກິດຂອງນາງນັ້ນ ມີລາຍງານວ່າ ນາງມີຊັບສິນຢູ່ທີ່ 100 ລ້ານໂດລາສະຫະລັດ

Coco Chanel ໄດ້ຈາກໂລກນີ້ໄປຢ່າງສະຫງົບເມື່ອວັນທີ 10 ມັງກອນ ປີ 1971 ໃນອາຍຸ 87 ປີ ໃນຂະນະທີ່ນາງກຳລັງຢູ່ໃນຊ່ວງອອກແບບງານຄໍເລກຊັ່ນສຳລັບລະດູໃບໄມ້ປົ່ງຂອງປີນັ້ນ (ເວົ້າໄດ້ວ່າ ນາງໄດ້ເຮັດໃນສິ່ງທີ່ຮັກຈວບຈົນລົມຫາຍໃຈສຸດທ້າຍ) ທີ່ໂຮງແຮມຣິທຊ໌ ໂດຍພິທີງານສົບຂອງນາງຖືກຈັດຂຶ້ນທີ່ Eglise de la Madeleine ໂດຍມີເຫຼົ່ານາງແບບມາຮ່ວມໄວ້ອາໄລນາງເປັນເທື່ອສຸດທ້າຍກັນຢ່າງລົ້ນຫຼາມ.

ນັບຕັ້ງແຕ່ປີທີ່ Coco Chanel ກໍ່ຕັ້ງແບຣນດ໌ Chanel ຂຶ້ນມາຕັ້ງແຕ່ປີ 1909 ຈົນເຖິງປະຈຸບັນໃນປີ 2022 ແບຣນດ໌ Chanel ນີ້ ກໍມີອາຍຸຮ່ວມກວ່າ 113 ປີເຂົ້າໄປແລ້ວ ແລະຕົວຂອງແບຣນດ໌ເອງນັ້ນກໍມີມູນຄ່າກວ່າ 8,000 ກວ່າລ້ານໂດລາ ໂດຍເປັນແບຣນດ໌ທີ່ມີມູນຄ່າສູງເປັນອັບດັບທີ່ 87 ຂອງໂລກ (ສະຖິຕິປີ 2018).

Chanel ເຄຍກ່າວເອົາໄວ້ວ່າDon’t spend time beating on a wall, hoping to transform it into a door.

ໝາຍເຖິງ ຈົ່ງຢ່າເສຍເວລາໄປທຸບຝາ ເພື່ອຫວັງໃຫ້ມັນກາຍເປັນປະຕູ ຄືກັບຕອນທີ່ນາງຄົ້ນພົບວ່າ ນາງບໍ່ເໝາະກັບການຮ້ອງເພງ ແຕ່ນາງສາມາດອອກແບບແລະຫຍິບຜ້າໄດ້ເປັນຢ່າງດີ ຖ້ານາງໄປໂຟກັດທີ່ການເປັນນັກຮ້ອງ ເຮົາຄົງບໍ່ເຫັນແບຣນດ໌ Chanel ໃນມື້ນີ້

Resources: https://en.wikipedia.org/wiki/Coco_Chanel https://astrumpeople.com/coco-chanel-biography https://www.biography.com/people/coco-chanel-9244165 https://www.forbes.com/companies/chanel/ https://www.celebritynetworth.com/richest-businessmen/richest-designers/coco-chanel-net-worth/ https://www.marketingoops.com/zfeature/chanel-facts/ https://www.voicetv.co.th/read/99212 https://www.jeab.com/shoe-bag/brand/chanel/chanel-2-55-classic-flap-b

Related Articles

Leave a Reply

Your email address will not be published.

Back to top button