ນັກກິລາບານເຕະທີມຊາດລາວ ຂໍກຳລັງໃຈຈາກແຟນບານລາວ

ນັກກິລາບານເຕະທີມຊາດລາວ ຂໍກຳລັງໃຈຈາກແຟນບານລາວ

ທັງຂຸ້ນຂ້ຽວຝຶກຊ້ອມກຽມລົງສະໜາມພົບທີມຊາດມາເລເຊຍ

ບໍ່ໜ້າເຊື່ອວ່າ: ການສະແດງຄຳຄິດຄຳເຫັນຕ່າງໆ ໃນສື່ອອນລາຍ ກ່ຽວກັບການລົງສະໜາມແຂ່ງຂັນຂອງທີມຊາດລາວ ທີ່ເສຍໃຫ້ ທີມຊາດຫວຽດນາມນັ້ນ, ຄູຝຶກ ແລະ ນັກກິລາ ຕ່າງກໍໄດ້ຮັບຮູ້ ແລະ ມີຜົນກະທົບຕໍ່ຈິດໃຈບໍ່ໜ້ອຍ ຈຶ່ງຝາກໃຫ້ແຟນບານລາວ ຢ່າຖິ້ມຢ່າປະກັນ ຂໍກຳລັງໃຈໃນນັດທີ່ຈະພົບກັບທີມຊາດມາເລເຊຍດ້ວຍ !

ການແຂ່ງຂັນເຕະບານ ຊິງແຊັມ ອາຊີ ຊູຊຸກິຄັບ 2020 ຫລື AFF SUZUKI CUP 2020 ທີ່ເລື່ອນການແຂ່ງຂັນມາຈັດໃນທ້າຍປີ 2021, ຮອບຄັດເລືອກແບ່ງກຸ່ມ B ທີມຊາດລາວຢູ່ຮ່ວມກຸ່ມກັບທີມແຂງຫລາຍທີມ, ນັດທຳອິດ ເສຍໃຫ້ທີມຊາດຫວຽດນາມ 0-2 ປະຕູ, ປັດຈຸບັນ ຄູຝຶກ ແລະ ນັກກິລາທີມຊາດລາວ ພວມຂຸ້ນຂ້ຽວຝຶກຊ້ອມເພື່ອກຽມລົງສະໜາມແຂ່ງຂັນກັບທີມຊາດມາເລເຊຍໃນວັນທີ 9 ທັນວານີ້ ເວລາ 16:30 ໂມງ ຕາມເວລາປະເທດລາວ ຈັດຂຶ້ນຢູ່ປະເທດສິງກະໂປ.

ສະຫະພັນບານເຕະແຫ່ງຊາດລາວ ແຈ້ງຂໍ້ມູນຫລ້າສຸດວ່າ: ການຝຶກຊ້ອມໃນໄລຍະນີ້ ບິນລີ້ ເກດແກ້ວພົມພອນ ມີອາການບາດເຈັບໃນການແຂ່ງຂັນນັດທີ່ພົບກັບທີມຊາດຫວຽດນາມ, ຄາດວ່າ ຈະເຊົາຈາກອາການບາດເຈັບ ພ້ອມລົງສະໜາມໃຫ້ກັບ ທີມຊາດລາວ ພົບກັບ ທີມຊາດມາເລເຊຍຢ່າງແນ່ນອນ.

ໂອກາດນີ້, ທ້າວ ສຸກອາພອນ ວົງຈຽງຄຳ ຫົວໜ້າທີມຊາດລາວຊຸດໃຫຍ່ເປີດເຜີຍຫລັງຈົບເກມການແຂ່ງຂັນວັນທີ 6 ທັນວາຜ່ານມາວ່າ: “ຕະຫລອດການແຂ່ງຂັນທີ່ພົບກັບທີມຊາດຫວຽດນາມ ແຟນບານລາວອາດຈະເຫັນວ່າ ນັກກິລາບໍ່ໄດ້ຫລິ້ນເກມບຸກຫລາຍປານໃດ ເນື່ອງຈາກເປັນເຕັກນິກຂອງຄູຝຶກໃຫ້ຫລິ້ນເກມຮັບກ່ອນ ພວກເຮົາກໍໄດ້ເຮັດເຕັມທີ່, ສ່ວນຜົນທີ່ອອກມາ ເສຍ 0-2 ປະຕູ ພວກເຮົາກໍຍອມຮັບ ແລະ ບໍ່ຢາກໃຫ້ແຟນບານໂທດນັກກິລາ ເພາະພວກເຮົາເຮັດເຕັມທີ່ແລ້ວ,

ເລື່ອງໃນສະໜາມແຂ່ງຂັນ ບໍ່ມີໃຜຮູ້ດີໄປກວ່າຕົວນັກກິລາ, ຄູຝຶກ ແລະ ພະນັກງານຊ່ວຍ. ການແຂ່ງຂັນຊຸດໃຫຍ່ນີ້ ນ້ອງໆໃນທີມມີການພັດທະນາຫລາຍ ໃນອະນາຄົດ ຄາດວ່າ ພວກເຮົາຈະໄດ້ເຫັນທີມຊາດລາວທີ່ແຂງແກ່ນກວ່ານີ້. ໃນນັດທີ່ຈະພົບກັບທີມຊາດມາເລເຊຍ ພວກເຮົາກໍຝຶກຊ້ອມເຕັມທີ່ ເນັ້ນເກມບຸກຫລາຍຂຶ້ນ. ຝາກເຖິງແຟນບານລາວ ຢ່າຟ້າວປະຖິ້ມກັນເທື່ອ, ປ່ຽນຈາກຄຳດ່າ ຂໍເປັນກຳລັງໃຈໃຫ້ພວກເຮົາແດ່! ຂໍຂອບໃຈ”.

ເປັນຄຳເວົ້າທີ່ສະແດງໃຫ້ເຫັນວ່າ: ບັນດາຄູຝຶກ ແລະ ນັກກິລາ ຕ່າງກໍໄດ້ຮັບຜົນກະທົບຈາກຄຳຕຳນິຕິຕຽນຂອງແຟນບານ. ຢ່າງໃດກໍຕາມ, ຂໍເປັນອີກແຮງກໍາລັງໃຈສົ່ງເຖິງທັບນັກກິລາລາວ ຂໍໃຫ້ສູ້ໆ ເຮັດໃຫ້ເຫັນໄດ້ທ່າພັດທະນາຂຶ້ນ, ຜົນເສຍ ຫລື ໄດ້ ຖ້ານັກກິລາໄດ້ເຮັດເຕັມທີ່ແລ້ວ ພວກເຮົາແຟນບານກໍຊົມເຊີຍໃນຄວາມສາມາດ ໂດຍສະເພາະການຜ່ານຜ່າຄວາມກົດດັນ ຄວາມສູ້ຢັນຕໍ່ສະພາ

ອາກາດ,ອາຫານການກິນທີ່ບໍ່ລຶ້ງປາກ, ການຫລັບການນອນ ທີ່ບໍ່ຄືຢູ່ບ້ານຕົນເອງ. ລາວ ສູ້ໆ !!

ໂດຍ: ສ. ສີພັນຄຳ

ຂປລ

ໜັງສືພິມປະເທດລາວ

ຄໍລຳວົງຈອນກິລາ

ຂໍຂອບໃຈຂໍ້ມູນ ແລະ ພາບຈາກ ສະຫະພັນບານເຕະແຫ່ງຊາດລາວ

Related Articles

Leave a Reply

Your email address will not be published.

Back to top button