ຂ່າວດີ! ຝຣັ່ງຊ່ວຍສະບຽງອາຫານທີ່ຈຳເປັນ ໃຫ້ແກ່ແຮງງານລາວ ຢູ່ສູນຈຳກັດບໍລິເວນ

ຝຣັ່ງຊ່ວຍສະບຽງອາຫານທີ່ຈຳເປັນ
ໃຫ້ແກ່ແຮງງານລາວ ຢູ່ສູນຈຳກັດບໍລິເວນ

ຂປລ. ໃນວັນທີ 16 ກັນຍາ 2021 ທີ່ນະຄອນຫລວງວຽງຈັນ, ລັດຖະບານຝຣັ່ງ ໄດ້ມອບການຊ່ວຍເຫລືອ ຈໍານວນ 236.000 ໂດລາສະຫະລັດ ໃຫ້ແກ່ລັດຖະບານລາວ ກໍຄື ກະຊວງສາທາລະນະສຸກ ໂດຍຜ່ານອົງການອາຫານໂລກ ເພື່ອຊ່ວຍເຫລືອທາງດ້ານສະບຽງອາຫານ ທີ່ມີໂພຊະນາການ 3 ຄາບ ໃນແຕ່ລະມື້ ໃຫ້ແກ່ແຮງງານລາວ ຫລາຍກວ່າ 5.600 ຄົນ ທີ່ກັບມາຈາກຕ່າງປະເທດ ຢູ່ໃນສູນຈຳກັດບໍລິເວນ 18 ສູນ ໃນ 7 ແຂວງ ຄື:

ນະຄອນຫລວງວຽງຈັນ, ບໍ່ແກ້ວ, ໄຊຍະບູລີ, ວຽງຈັນ, ຈຳປາສັກ, ສະຫວັນນະເຂດ ແລະ ສາລະວັນ. ຕາງໜ້າມອບ ໂດຍ ທ່ານ ຢານ ເດລບາເຣີ ຜູ້ອຳນວຍການ ອົງການອາຫານໂລກ ປະຈຳ ສປປ ລາວ, ຕາງໜ້າຮັບໂດຍ ທ່ານ ດຣ. ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ເຂົ້າຮ່ວມເປັນສັກຂີພິຍານຂອງ ທ່ານ ນາງ ຟລໍຣັອງສ ຊັອງບລັອງ-ຣີສແລກ ເອກອັກຄະລັດຖະທູດແຫ່ງປະເທດຝຣັ່ງ ປະຈໍາ ສປປ ລາວ.

ທ່ານ ດຣ. ບຸນແຝງ ພູມມະໄລສິດ ກ່າວວ່າ: ຄື້ນການລະບາດຂອງພະຍາດໂຄວິດ-19 ໃນປະເທດລາວໃນປັດຈຸບັນ ແມ່ນໄດ້ຮັບຜົນຈາກການລະບາດທີ່ເກີດຂຶ້ນຢ່າງໄວວາ ໃນປະເທດເພື່ອນບ້ານ. ບັນດາສູນຈຳກັດບໍລິເວນ ແມ່ນມີໜ້າທີ່ອັນສຳຄັນທີ່ສຸດໃນການປ້ອງກັນ ແລະ ຄວບຄຸມການລະບາດໃນທົ່ວປະເທດ. ພວກເຮົາມີຄວາມດີໃຈທີ່ປະຊາຊົນລາວທຸກຄົນ ສາມາດກັບຄືນມາບ້ານໂຕເອງໄດ້, ໃນຂະ ນະທີ່ມີມາດຕະການໃນການປົກປ້ອງໃຫ້ຫລາຍໆຊຸມຊົນ ແລະ ຫລາຍໆຄອບຄົວ ທີ່ດຳລົງຊີວິດຢູ່ໃນປະ ເທດລາວໃຫ້ມີຄວາມປອດໄພ.

ການຊ່ວຍເຫລືອໃນຄັ້ງນີ້, ຈະປະກອບສ່ວນໃນວຽກງານຊ່ວຍເຫລືອ ແລະ ສະກັດກັ້ນການແຜ່ລະບາດພະຍາດດັ່ງກ່າວ, ເຊິ່ງການສະໜອງອາຫານປະຈໍາວັນ ໃຫ້ແກ່ແຮງງານທີ່ກັບຈາກຕ່າງປະເທດໃນບັນດາສູນຈໍາກັດບໍລິເວນເຫລົ່ານີ້ ຈະຊ່ວຍໃຫ້ບັນດາແຮງງານໃຫ້ຢູ່ໃນສູນຕະຫລອດໄລຍະການຈຳກັດບໍລິເວນ. ການຊ່ວຍເຫລືອດັ່ງກ່າວ, ຍັງໄດ້ຊ່ວຍໃຫ້ພວກເຂົາເຫລົ່ານັ້ນ ມີສຸຂະພາບແຂງແຮງ, ການເປັນຢູ່ທີ່ດີ, ໃນເວລາດຽວກັນກໍ່ຫລຸດຜ່ອນຄ່າໃຊ້ຈ່າຍຕ່າງໆຂອງພວກເຂົາ ແລະ ຄອບຄົວຂອງພວກເຂົານຳອີກ.

ທ່ານ ນາງຟລໍຣ້ອງສ ຊັອງບລັອງ-ຣີສແລກ ເອກອັກຄະລັດຖະທູດແຫ່ງປະເທດຝຣັ່ງ ປະຈໍາ ສປປ ລາວ ກ່າວວ່າ: ການຊ່ວຍເຫລືອທາງດ້ານສະບຽງອາຫານ ແມ່ນເປັນວຽກງານສ່ວນໜຶ່ງທີ່ຈຳເປັນ ເພື່ອເຮັດໃຫ້ສູນຈຳກັດບໍລິເວນ ສາມາດດໍາເນີນວຽກງານໄດ້, ດ້ວຍເຫດນີ້ ປະເທດຝຣັ່ງ ຈຶ່ງໄດ້ອະນຸມັດ ການຊ່ວຍເຫລືອດັ່ງກ່າວ, ເຊິ່ງການຊ່ວຍເຫລືອນີ້ແມ່ນເປັນຄັ້ງທີ 2 ຫລັງຈາກທີ່ໄດ້ມອບເງິນຊ່ວຍເຫລືອ ຈໍານວນ 500.000 ເອີໂຣ ເພື່ອປັບປຸງຄວາມໝັ້ນຄົງທາງດ້ານສະບຽງອາຫານ ແລະ ໂພຊະນາການ ໃນບັນດາແຂວງພາກເໜືອຂອງປະເທດລາວ.

ທ່ານ ຢານ ເດລບາເຣີ ກ່າວວ່າ: ນັບແຕ່ເດືອນມິຖຸນາ 2020, ພວກເຮົາໄດ້ແຈກຢາຍອາຫານປະມານ 1,7 ລ້ານຄາບອາຫານ ໃຫ້ເກືອບ 65.000 ຄົນ, ພວກເຮົາມີຄວາມພາກພູມໃຈຫລາຍ ທີ່ໄດ້ເຫັນປະເທດຝຣັ່ງ ກາຍເປັນໜຶ່ງໃນບັນດາອົງການເພື່ອນຮ່ວມງານ ທີ່ປະກອບສ່ວນຊ່ວຍເຂົ້າໃນວຽກງານອັນຈຳເປັນນີ້. ພວກເຮົາຂໍຮຽກຮ້ອງ ເຖິງບັນດາອົງການຈັດຕັ້ງສາກົນ ເພື່ອສືບຕໍ່ໃຫ້ການຊ່ວຍເຫລືອສູນຈຳກັດບໍລິເວນດັ່ງກ່າວ, ເຊິ່ງປຽບເໝືອນກຸນແຈອັນສຳຄັນ ໃນການຮັບມືກັບການແຜ່ລະບາດຂອງພະຍາດໂຄວິດ-19 ໃນ ສປປ ລາວ ໃນໄລຍະສັ້ນ ແລະ ໄລຍະກາງ.

Related Articles

Leave a Reply

Your email address will not be published.

Back to top button